| تبليغات | X |
 |
 |
|
| آذربایجان یئنی ادبیات درگیسی/AZƏRBAYCAN YENİ ƏDƏBİYYAT DƏRGİSİ |
|
گؤی اوزو داش ساخلاماز شعرلر و پوئمالار رامیز روشن کؤچورن: زهرا قیطرانیاسکانلو حاضیرلایان و ائدیتور: سعید موغانلی ایلیستراسیون(رسملر): اردشیر رستمی دیزاینئر: مهیار علیزاده.آیخان تایپ: کاووسنصیری یایینلایان: یاشماق درگیسی شابک:0-87-6743-965 بیچیمی: رقعی بیرینجی چاپ،تبریز، 1386 - یای قیمت: 3000 تومن گلن نهدی، گئدن نهدی؟ بَلَک نهدی، کفن نهدی!؟ بو دونیا اؤز کئفیندهدی، یاغیش یویور، گون قورودور. یاشماقدان سیزه ایتحاف... دونیایلا دالاشماق آسانمیش دئمه چتینی دونیایلا باریشماق ایمیش رامیزین شعرلری ایگیرمیدن آرتیق دونیا دیللرینه او جوملهدن اینگیلس، فرانسیز، آلمان، اسپان، پولیاک، بولقار، اوکراین، روس و... چئوریلیب سئویله-سئویله اوخونور و اوخوجولارینی سئویندیریر. بیز ده سئوه-سئوه اوخویوب و حاضیرلادیغیمیز بو کیتاب، سئویملی اوخوجولاری سئویندیرهجهیینه ایناناراق سئوینیریک. کیتابین ایچری و جیلد طرحلرینی هنرمند دوستوموز اردشیر رستمی ایشلهییب، و رامیزه یاراشان بدیعی تصویرلرله اؤز هونرینی شاعیرله یئکونلاشدیرمیشدیر. اردشیرین بوندان قاباقکی ایشلریله تانیش اولمایانلارا وورغولاماق گرکیر کی، بو صنعتکارین طرحلریله دونیانین بؤیوک شاعیرلرینین او جوملهدن «آدونیس/ اوکتاو یوپاز/ یانیس ریتسوس/ پابلو نئرودا/ محمد درویش/ احمد شاملو/ فروغ فرخزاد/ و بؤیوک ناظیم حیکمت»ین اثرلری ده گؤزلجهسینه بزنمیشدیر. بو کیتابی باکیدان نه زحمتله! گتیریب و اونون مادی خرجینی اؤدهین «صابیر قیطرانی» و کیتابی دیققتله کؤچورن آیدین دوشونجهلی حیات یولداشی خانیم «زهرا قیطرانی» اولوبدور. بو اوغورلو حیات یولونو سئچمک هر آداما قیسمت اولمور. بو بر-بزهکلی دونیانین آل-قوماشی گؤزلری قاماشدیران بیر دؤورده کیرایهده اوتورارکن بئله بیر هزینه قویماق و مقدس بیر معنوی دوشونجه و معنوی باخیشین اؤیهسی اولوب بئله بیر ایشلری بیتیرمک، آرتیق قیمتلندیریلمهلیدیر. بیز اونلارا داها اوغورلو عؤمور یولو دیلهییریک. اونسوز دا خالق اؤز فداکار اوغوللارینی تانییر... بو کیتابی حاضیرلاییب چاپ ائتدیرمک اوچون، بیر چوخ زحمتلره قاتلانیب و اللریندن گلن قدر بیزه یاردیم اولان جنابلار خانیم «معصومه گلزار» و «کاوس نصیری»یه اؤز سایغیلاریمیزی بیلدیریریک. سعید موغانلی. یای 1386
گئدک بيز اولمايان يئره گل، اَل- اله توتوب گئدک، گئدک بیز اولمایان یئره. هر دردی اونودوب گئدک دردیمیز اولمایان یئره بورادا قویاق اؤزوموزو، بو قیریشان اوزوموزو بو کؤهنهلن سؤزوموزو گئدک سؤز اولمایان یئره بیر کیمسه توتماسین خبر، گَل، چیخیب گئدک بیر تَهَر بو ائو، بو کوچه، بو شَهَر، بو دنیز اولمایان یئره. ... آتام اوغلو، آز چابالا، سن دئین چتین تاپیلا، بو رامیزی کیم آپارار بو رامیز اولمایان یئره؟!..
آی ایشیغی آی ایشیغی دوشدو گؤیدن، جانیمدان، قانیمدان کئچدی، گؤزومون ایچیندن کئچدی، اؤزومون ایچیمدن کئچدی کئچدی دابانیمدان کئچدی آز قالدی کی، ایکی یئره بؤله منی باشیمدان گؤیه میخلادی دابانیمدان یئره منی ها ایستهدیم آددیم آتا بیلمهدیم... یانیمدان آداملار کئچیر، آی ایشیغی، نه وئجینه؟ بوراخ منی، آی ایشیغی گئدیم ایشیمه-گوجومه بو نه ایشدی آی ایشیغی نییه یولون مندن کئچدی؟ هامی چاشدی آی ایشیغی گورن-گورن گئندن گئچدی. دئدیلر دَلیدی نهدی هره بیر آد وئردی منه کیمی باخیب کول ائلهدی کیمی باخیب گولدو منه ... بو منیم اَلیم آیاغیم بو آغزیم بورنوم قولاغیم کیمسهدن اسکیکلیییم یوخ یوخ کیمسهدن آرتیق لیغیم بوراخ گئدیم آی ایشیغی!... آمان آتام او نه داشدی؟! او داش آتان هارا قاچدی؟ ایتلر جانیما داراشدی بوراخ گئدیم آی ایشیغی سن دادیما یئتیش، آنا، آنا، سنین بالان منم بو گئجه آی ایشیغینا چارمیخلانیب قالان منم آنا، مندن کئچن بو ایشیق نهیمیش آنا، من کی ایشیق یئین دئییلم گؤرونور باختیم بئلهیمیش باختیمی سؤین دئییلم. اؤلمهمیشم آغلامایین کئچین آیاق ساخلامایین قاپیلاری باغلامایین اونسوزدا دؤین دئییلم ... یالاما چکمهم کیرلیدی هورمه جانیم فیکیرلیدی ال چک آی آللاهین ایتی من سنین ییهن دئییلم دیلم لال باشیم آشاغی ائوین اَن ماغمین اوشاغی بوراخ گئدیم آی ایشیغی من ده سن دئین دئییلم... قدریمی بیلمهدی بو آدام منیم بیلمیرم هایاندان تاپدی عؤمرومو بیر دلی آت کیمی چاپدی عؤمرومو داغلارا-داشلارا چیرپدی عؤمرومو قدریمی بیلمهدی بو آدام منیم،- ایلاهی، آل منی بونون الیندن! کاش منیم عؤمرومو بو یئر اوزونده بیر اؤزگه آداما توش ائلهیهیدین لاپ منی آدام یوخ قوش ائلهیهیدین لاپ بئله بیر قارا داش ائلهیهیدین منی بو آداما سن نئجه قئیدین،- ایلاهی، آل منی بونون الیندن! آل منی، وئر منی، اؤزگهلره وئر، قیریق آینالارا، گؤزگولره وئر بؤلونوم، یوز تیکه، مین تیکه اولوم، بو آدام اوزومه باخا بیلمهسین منی آینالارین قیریقلاریندان توپلایا بیلمهسین ییغما بیلمهسین،- ایلاهی، آل منی بونون الیندن! بؤلونسم دردیم ده بؤلوندو بلکه هر دردیم یوز تیکه، مین تیکه اولدو. بیر دردیم قالمادی اؤزومدن یئکه بوتون دردلریمدن من یئکه اولدوم. بو یئرین اوستونده، گؤیون آلتیندا بؤلونسم، هر تیکم بیر یانا دوشسه هاچانسا کئفینین خوش ساعاتیندا ایلاهی تزهدن یادینا دوشسم تزهدن توپلاسان قیریقلاریمی سینیق اللریمی آیاقلاریمی آغزیمی بورونومو قولاقلاریمی ایلاهی تزهدن جالاسان منی دونیانین اَن گؤزل گوزگوسو اوللام تزهدن دونیایا یوللاسان منی بو آدام اولمارام اؤزگهسی اوللام،- ایلاهی، آل منی بونون الیندن!..
ایلان بالاسی بؤیویور کؤرپه ایلان بالاسی گاه او باشا گاه بو باشا سورونور سئوینیر اوددوغو هاوایا سویا تورپاغا سئوینیر داشا سئوینیر بیرسئوگی هوسی دولور جانینا گئجهلرگؤزونون ایتیر یوخوسو چیچه یین قوخوسو اوتون قوخوسو کولهیین نفسی دولور جانینا ...اؤزوندن خبرسیز سسسیز- سمیرسیز زهَره چئوریلیر جانیندا هر شئی... بوایلان بالاسی بیر واخت جانیندا گیزلهنن زهردن خبر توتاجاق بلکه قارغییاجاق باختینی اوندا بلکه بوغازینی قهر توخاجاق آغلاما، آغلاما ایلان بالاسی، باختینی قارغیما ایلان بالاسی! بو دا بیر عؤموردو دؤزهسن گرک بئلهیمیش طالعین امری بویروغو دؤشونون آلتیندا سئون بیر اورهک دیشینین آلتیندا زَهَر تولوغو گؤرنلر چیغیرار: -ایلان وار، ایلان!... قوودوقجا قووارلار سنی دونیادا. هر یئردن کسیلر یولون-یولاغین تک بیرجه یول قالار سنه دونیادا باشیندان قویروغوناجان، زَهَرلی دیشیندن قویروغوناجان تک بیرجه یول قالار،- او یول اؤزون سن اؤزون اؤز یولونسان ایلان بالاسی اؤزون بو دونیادا اؤز عزیزینسن اؤزون اؤز بالانسان ایلان بالاسی هارا قاچاجاقسان گؤز قاباغیندان بو ظالیم دونیایلا نئیلهیهجکسن؟ یوز یول چیخاجاقسان اؤز قابغیندان اؤزوندن آیریلا بیلمهیهجکسن. اویرن، یاواش یاواش اؤزونه اؤیرن دونیانین هر جوره اوزونه اؤیرن باریش جانینداکی زهرلی دردله اییرهنمه اؤزوندن ایلان بالاسی بلکه ده اَن آجی حقیقت ائله سن سن یئر اوزونده ایلان بالاسی سن سن حاققین یولو بو یئر اوزونده تانری اؤزو سئچیب بو یولو بلکه. یوز جور صیفتییله، یوز جور اوزویله دونیا سندن کئچیب دورولور بلکه... چارمیخداکی عیسی من سنین اوغلونام بو یئر اوزونده، حسرتینله گؤیه، چوخ باخدیم آللاه. آخیرکی آرزیما چاتدیم دئیهسن، آیاغیم اوزولدو تورپاقدان آللاه. داها یئرله گؤیون آراسیندایام چارمیخا چکیلیب قالمیشام آللاه. میسمارلانیب آیاقلاریم، اَللریم، اؤزوم اؤز تابوتوم اولموشام داها. گزیر قاریشقا تک، گزیر جانیمدا دالاییر جانیمی بو گون ایشیغی قیییب گؤزلرینی باخیر خانیملار باخیب، سوزور منی، بئلدن آشاغی. اؤلوم دئییلن شئی، سون یوخودورسا اگر یاتمیشامسا- یوخوم آغریییر. چارمیخا چکیلن قورو جانیمدی، بس نییه گؤرهسن روحوم آغریییر؟! بو آغری اوزانیر بیر کندیر کیمی باغلاییر روحومو جانیما آللاه. روحوم بدنیمدن آیریلا بیلمیر اوچوب گله بیلمیر یانینا، آللاه. بو آغری- جانیمین اَذییتیدی روحوما آتیلان قارماقدی یوخسا؟ بو آغری- دونیانین سون لذذتیدی بو آغری- سونونجو گوناهدی بلکه؟ یوخ، من بو لذذته دؤزمورم داها، منه بو چارمیخدان قاچماغا گوج وئر. گوج وئر، بو آغریدان جان قورتارماغا قوش اولوب یانینا اوچماغا گوج وئر. دوستلار گؤز یاشینی سیلیر گیزلیجه اونلار قارانلیغی گؤزلهیهجکلر. چارمیخدان قورتاریب منی بو گئجه بلکه ده هارداسا گیزلهیهجکلر. هاردا؟ نییه؟ کیمدن؟ نئجه گیزلهنیم؟ من اؤز طالعیمدن نئجه گیزلهنیم؟! یوز یول اللریمله اؤرتسم ده، هئچ واخت گیزلهیه بیلمهرم اوز- گؤزومو من. هامی گؤرر منی اوووجلاریمدا قارالان او میسمار دئشیکلریندن. من اوجور باشلاییب اؤله بیلمهرم آزاردان، بئزاردان، یا قوجالیقدان، یوخ، من بو چارمیخدان ائنه بیلمهرم من ائنه بیلمهرم بو اوجالیقدان. آمما دؤزهنمیرم،- یا جانیمی آل یا دا آل جانیمدان آعرینی آللاه. یادا سال، یادا سال، منی یادا سال یوخسا اونوتموسان اوغلونو آللا؟! ...غیفلتن گون باتدی دونیا قارالدی آمـما سنی گؤردوم بیردن بیره من. اللرین روحومو چارمیخدان آلدی تاپیشردیم روحومو او اللره من. گؤردوم- قارانلیقین ایچینده سنی اللرین آی کیمی گونش کیمیدی. گؤردوم- منیم روحوم، اووجوندا سنین، اؤزونه دن گزن بیر قوش کیمیدی. داها بو چارمیخدان آزاددی روحوم داها بو جانیم دا، آغریمیر، آللاه. اووجوندا گؤر نئجه راحاتدی روحوم بس نییه اووجوندان قان دامیر، آللاه؟!... اوغلومون گؤزلری هایانا یول آلسام یولوم باشلاییر اوغلومون گؤزلریندن. گون چیخیر، آی دوغور، اولدوزلار یانیر قار یاغیر، دولو باشلاییر اوغلومون گؤزلریندن. توتور یئری-گؤیو، توتور گؤزلری کئچدییم یوللاری اودور گؤزلری دویمور کی، دویمور، کیرپیکلری بیتیر یول قیراغیندا منی یولومدان چیخماغا قویمور کی، قویمور یانیندا اوزوم آغدی، آلنیم آچیقدی آللاه منی هر گوناهدان اوغلوم ساخلاییر بو یول نییه بئله پالچیقدی آللاه یوخسا هایانداسا اوغلوم آغلاییر؟! آغلاییر گؤز یاشی دوشور یولوما... یاش ایچینده گزیرم منیم بالام. گؤزلریندن ایشیق دوشور یولوما یومما گؤزلرینی، یومما آزارام منیم بالام. نه واردی نه یوخدو گؤزلرینهجن؟ دونیا قارانلیقدی گؤزلرینهجن تانری منی بو اینسان یوواسینا آتینجا گلیب سنین گؤزلرینین ایشیغینا چاتینجا عؤمرومون اوتوزاوچ ایلینی کئچدیم کئچدیم قارانلیقدان اَل هاواسینا داها سندن گیزلی دئییل دونیا بیر آددیم. گیزلنه بیلمهرم داها گؤزونده منیم بالام. بیر تانریدی سئوه سئوه قورخدوغوم بیر ده سنسن، بو دونیا اوزونده منیم بالام نه یاخشی کی، تانریدان دا اؤزگه بیزی گورن یوخ یولوموزا ایشیق سالیر بالالارین گؤزلری اؤز یولونو آزانلارین بالالاری کور قالار قارانلیقدان ایتیب باتار آتالارین اؤزلری. ... بالالارا تانری قییماز!... یوخ، باتساق دا گوناها، - قارانلیقدا یانار هله بالالارین گؤزلری چیراق- چیراق تانری بیزی گؤرمور داها اومید یوخدو آللاها،- قارانلیقدان بیزی آنجاق بالالار چیخاراجاق... |
|
+ یازیلدی
2007/11/8ساعات 15:38 یازارلار قروپو |
|
|
بیرینجی صحیفه آرشیو |
| بیزیم وبلاق |
«یاشماق» آذربایجان یئنی ادبیات درگی سینین وبلاقی
یئنی ادبیات آنلاییشینا دوغرو |
| گوندَلیک باغلانتی لار |
|
G O Z L A R I A Y D I N گوندلیک باغلانتی لار آرشیوی |
|
RSS
|