ویلیام شکسپیر

طلعت ایوب / سعید موغانلی

هاملت پیئس (نمایشنامه)سینی قورئیلی بؤیوک چئویرمن و یازار  رحمتلیک طلعت ایوب آذربایجان تورکجه سینه پای گتیرمیش و سووئتلر چاغیندا دؤنه لرله چاپ اولموشدور. البته اوچ باشقا مترجیم ده (جعفر جاببارلی و حق وئردییئف) اثری او دؤورده چئویریب یایینلامیشلار.  

اثر تهراندا اندیشه نو یایین ائوی و یاشماق سیرا کیتابلاری طرفیندن ایکینجی پیئس کیمی تئاتر اوخوجولارینا سونولموشدور. بیرینجی پیئس ساعیدی نین یازدیغی قوردلار اثری بو سیرادان  یایینلانمیشدیر. کیتابی سعید موغانلی و تبریزین گنج تئاتر یؤنتمنی آیدین سرداری نیا حاضیرلامیش و  سایین اؤیکوچو  حامد احمدی کؤچوروب و مهیار علیزاده.آیخان اؤز گرافیک هونرییله بزه میشدیر.

 دونیانین بؤیوک یازیچیلاری سیراسیندان گونئیده ایکینجی اثر(ترجمه)ساییلان هاملت سامباللی ترجمه یه مالیکدیر. دونیا یازار و شاعیرلریندن بیرینجی اثر زاپون هایکولاری اولموشدور. اوخوجولارین بو قونودا باخیشلاری بیزیم اوچون بؤیوک اؤنم داشیییر.   

سایین ادبیاتچی لار  ُ اؤزللیکله نثر و تئاتر وورغونلاری هاملت کیتابینی معتبر کیتاب ائولریندن الده ائده بیلرلر. 

اؤلوم اؤپوشوندن یانمیش للک­لر

 آه گؤزلرینده دوغولماق!..

کیان خیاو

آذربایجان چاغداش شعرینین بو گونکو تمثیلچی­لریندن بیری ساییلان کیان خیاوین ایکی شعر توپلوسو ایشیق اوزو گؤرموش. (اؤلوم اؤپوشوندن یانمیش للک­لر / آه گؤزلرینده دوغولماق!) شعر کیتابلاری شاعیرین بو ایلین پاییزیندا نشر اولان اثرلریدیر.

بو ایکی مجموعه­ده کیان خیاوین وئردییی شعر اؤنک­لری بو گونکو شعریمیزین نئجه گلیشمه و مدرنلییه دوغرو گئتدییندن خبر وئریر. کیتاب­لار، مهیار علی­زاده آیخان جنابلارینین چوخ گؤزل و گؤز اوخشاییجی گرافیک و دیزاینی ایله یاشماق سیرا کیتاب­لاریندان نشر اولموشدور. کیتابی اوخوماغی بوتون آذربایجان چاغداش شعرینی ایزله­ینلره توصیه اولونور.

کیتاب­لارین واحید املا (اورتوگرافی) اساسلاری ایله یایینلانماسی ماراق دوغوراندیر. آدی گئدن اثرلر بو گونکو شعریمیزین جانلی و گوجلو نمونه­لریندندیر.

تانری داریخیر / شعر آنتولوژی­سی

سعید موغانلی

 چاغداش آذربایجان شعرینین گون-گونه گلیشمه­سی و دونیا شعریله آیاقلاشماغا  دوغرو یؤنلمه­سی بو گونلر بیر سیرا کیتابلاردا ماراق دوغوراندیر.

بوگونکو شعریمیزین انکشافینی تکجه آرا-سیرا یایینلانان کیتاب­لاردا یوخ بلکه بیر نئچه دؤنه چاپ اولان آنتولوژی (شعر مجموعه)لرینده آپ-آیدین گؤرمک و تحلیل ائتمک اولار. بیرینجی دؤنه شاعیر (ائل اوغلو)نون حاضیرلادیغی "ایل­لرین قانادیندا"، علی داشقین­ین "آلیشیق"،محمدرضا مقدسی­نین "بوز چیچه­یی"، آیداش دلی­سئل­ین "باش چیخاران اؤلوم" و سعید موغانلی­نین "قیزیل آلمالار"، "تانری داریخیر" اثرلرینی گؤزدن کئچیرینده شعریمیزین گؤزللییی و اؤزللییینه اینانماق اولار. تانری داریخیر  شعر آنتولوژی­سی­نی یاشماق سیرا کیتاب­لاریندان بیری کیمی سعید موغانلی توپلامیشدیر. و اللی­یه یاخین معاصر شاعیرین شعری گئدن اثر تدقیقاتچی­لار و ادبیاتچی­لار اوچون ال-وئریشلی مجموعه کیمی حسابلانا بیلر. یاشماق سیرا کیتاب­لارینین اوچونجو آنتولوژیسی ساییلان اثرده ماراق دوغوران شعرلرله اوزبه اوزه گله­جک­سینیز، اوخویون مطلق...  

 الیمده اللی بارماق (شعر توپلوسو)

نیگار خیاوی

 تانینمیش شاعیر نیگار خیاوی­نین "الیمده اللی بارماق" شعر توپلوسو چوخ تمیز و گؤز اوخشاییجی بیر گؤرونوشله یایینلانمیشدیر.

اثر چاغداش شعریمیزین نمونه­سی کیمی حسابلاناق شعرله وئریلمیشدیر.

شاعیرین آلتینجی اثری اولان بو مجموعه­ده چوخ فرقلی شعرلر و پست­مدرن فضا و و دوشونجه­لر یئر توتموشدور. بوگونکو شعریمیزده قادین شاعیرلرین سحردن سونراکی دؤنومون بیریجیک تمثیلچیسی ساییلان نیگار خیاوی­نین بو اثرینده شعر دیلی و دیل قورولوشو و دیل اوستو یارادیجیلیغی داها ماراقلی­دیر.

اثری یاشماق سیرا کیتاب­لارینین 21-جی ساییسی اولاراق سعید موغانلی حاضیرلامیش و یایینلامیشدیر.

داغداغان (طنز)

 تانینمیش ناثیر و پوبلیسیست م.ع آغداشلی­نین حیکایت­لر توپلوسو (دؤرد ناغیل) و بیر نئچه ماراقلی ساتیریک (طنز) و پوپولار اثردن عبارت اولان داغداغان مجموعه­سی یایینلانمیشدیر.

حیکایه­لرین کندلرده باش وئردییینه گؤره اثرین دیلینده اونودولموش و آز قالا یاددان چیخمیش سؤزلرلرین دیریلمه­سینه راست گلیریک. ساتیریک یازی­لاردا ایسه چوخ دوداق قاچیریجی و البته اورکدن کدرلندیریجی اثرلرله اوزبه اوز اولوروق.

کیتاب بیر نئچه ایللر بوندان قاباقلاردا نشر ایجازه­سی آلمیشسا دا، اثری بو ایل یاشماق سیرا کیتاب­لاری نشر ائتمیشدیر. سایین دیل اؤیرنجی­لری کیتابی کوهنه نثر و دیلی اولماغینا باخمایاراق قدیم نثریمیزین نمونه­لرینی کشف ائتمک اوچون کیتابی گؤزدن قاچیرمامالی­دیرلار.  

آلمالاردا دیش ایزی (شعر توپلوسو)

بولنت اجویت - حاضیرلایان: آیدین روشن

 تورک دونیاسینین بؤیوک سیاست خادیمی و ادبیات عاشیغی بولنت اجویتین سئچیلمیش شعرلری آیدین روشن­ین کؤچورمه و رسول یونان­ین سئچمه­سی ایله ایشیق اوزو گؤرموشدور.

کیتابدا اجویتین عاشقانه شعرلری و عمومییتله اؤز حیات یولداشی رخشان خانیما یازدیغی شعرلر توپلانمیشدیر. اثرین تورکیه تورکجه­سیندن آذربایجان تورکجه­سینه چئویری­سی ماراق دوغوران اولموشدور.

آلمالاردا دیش ایزی شعر توپلوسونو یاشماق سیرا کیتاب­لاری نشر ائتمیشدیر.

اؤلولو بیزه گولور (شعر توپلوسو)

قشم نجفزاده - حاضیرلایان : ستار دادخواه

 بوگونکو شعریمیزین سانباللی نمونه­لریندن ساییلان اثرده، گون شعریمیزدن تام فرقلی اولان پست مدرن شعرلرله اوزلشمک اولور.

قشم نجف­زاده­نین بو اثرینده شعرین نه قدر ساده صمیمی و او قدر ده مضمونلو یارانماسی ماراق دوغوروجودور. شاعیرین بئشینجی اثری اولان کیتاب چوخ گؤزل گرافیک و دیزاینا مالیکدیر.

کیتابدا بیر سیرا دییشیلمیش فورمادا یارانان بایاتی و قوشما- گرایلی و هابئله قیسا و کیچیجیک شعرلر اینسانی بیر داها شعر و پوئزیانی یئنی­دن دوشونمه­یه چالیشدیریر. اثر بوگونه کیمی یایینلانان اثرلرین ایچینده قاباریق گؤرونور.

 بو ایلین پاییزیندا یاشماق سیرا کیتاب­لاری اؤلولو بیزه گولور شعر توپلوسونو یایینلامیشدیر.

سونای حیکایه­لری

سونای حیکایه اؤدولونون سئچیلمیش اثرلری "بیرلیک" اؤزل بوراخیلیشی کیمی یایینلاندی. سونای حیکایه توپلوسوندا ۲۵ حیکایه و ۵ مقاله و تنقید گئتمیشدیر. گنج گونئی حیکایه­چی­ لییینین بیرینجی آددیملاریندان ساییلان بو توپلودا ماراقلی اثرلر ایشیق اوزو گؤرموشدور.

گنجلیییمیزین نثر گلیشمه­سینین گؤرکملی اؤرنه­یی اولان اثرده  چاغداش حیکایه­نین نمونه­لریندن سانباللی اثرلر وئریلمیشدیر. بو گونه کیمی تایی گؤرولمه­ین بو چاغداش و مدرنلشمیش اؤیکو توپلوسو، گله­جه­ییمیزه آتیلاجاق آددیم­لارین باشلانغیجی کیمی ده ساییلا بیلر. اثرده بیر چوخ تانینمیش نثر و حیکایه یازارلاریمیزدان نمونه اثرلر وئریلمیشدیر. ادبیات وورغون­لار و اؤزللیکله نثر و اؤیکو ژانرینی ایزله­ین ادبیاتچی­لار بو توپلونو گؤزدن قاچیرمایین...

   "سونای حیکایه لری"نده اثرلری گئدن یازارلار:    (داوود دوستار- اکبر رضاپور- رقیه صفری- مرتضی مجدفر- محمود مهدوی / حمید آرغیش- عبدالمجید چاوشی­زاده- مژگان صیامی- زیبا منوچهری- ووقار نعمت / ائلدار خیاوی- مجید راستی- شلاله جوانشیر- علی نوری- حکیمه رسولی- نسرین شیرمحمدزاده- شریف مردی- احسان علیپور- محمدرضا فریدی- موسی رحیمی- صمد نظمی / نیگار خیاوی- رضا کاظمی- محمد صبحدل- حامد احمدی / بولود مرادی- سعید موغانلی)

  بیرلیک اؤیرنجی درگی­سی

 بیرلیک درگی­سینین اوچونجو سایی، تخصصی اولاراق حیکایه و شعر اؤزل سایی کیمی نشر ائدیلدی. درگی، گوجلو گنج اؤیکوچو حامید احمدی­نین باش یازارلیغی ایله و بیر سیرا تهرانین علامه بیلیم یوردوندا اؤیرنجی اولان، آذربایجانلی­ گنج یازارلار امه­ییله یایینلانمیشدیر.

درگی­نین حیکایه بؤلومونده: اسماعیل شیخلی(آذربایجان)/ موراد کؤهنه قالا(آذربایجان)/ نازان بکیراوغلو(تورکیه)/ دوران چتین(تورکیه)/ویلیام فاکنر(آمئریکا)/ والئری کوکس(ایتالیا)/ یوکیو میسیما(ژاپن)/ محمود مهدوی(اردبیل)/  رشاد مجید (باکی)/ عباس معروفی(تهران)/  حامد احمدی...

 و شعر بؤلومونده: واقیف ابراهیم/ سعید موغانی/ باریش آخارسو/ دومان اردم/ بولود مرادی/ مارتین ایوئتلسکی/ ویسلاواشیمبوریسکایا/ لنگستون هیوز/... کیمی یازار و شاعیرلردن اثرلر چاپ اولموشدور.

درگی­نین امکداش­لاری : رضا کاظمی/ سعید موغانلی/ ائیواز بیات/ مهدی رضایی/ رضا روحی/احسان علیپور/تهمینه زاردشت/آراز قاراباقی جنابلاری­دیر...

 ساده­سن و گؤزل بیر سالام کیمی... (شعر توپلوسو)

حسین رزمی

 میانالی شاعیر، حسین رزمی­نین یئنی و اوچونجو اثری اولان بو شعر توپلوسو شاعیرین قیسا و هایکویا بنزر شعرلرینی احتیوا ائدیر.

توپلونون یاریدان چوخ شعرلرینده بدیعی­لیک و شاعیرلیک خصوصیاتی قاباریق شکیلده گؤرونمکده­دیر. و بونونلا بئله وورغولاماسی یئرینه دوشردی کی دئیک: بو توپلو، راسیم قاراجانین "اؤلوم حاققیندا گونش" و قشم نجف­زاده­نین "اؤلولر بیزه گولور" و هابئله سعید موغانلی­نین توپلادیغی "قیزیل آلمالار" شعر توپلولاریندان سونرا یایینلانان (کیچیک شعرلر توپلولاریندان) ان موفق اثردیر.

 شاعیرین باشقا ایکی کیتابی ، بیر سیرا یاییم و تبلیغ و هابئله متن چاپینین کئفییتسیز (قیرمیزی چاپ)لیییندن آسیلی اولاراق تانینمامیشدیر.

حسین رزمی­نین ایکینجی کیتابی دا چوخ ماراق دوغوران  و دَیرلی بیر اثردیر.

داها دوغروشو شاعیری تعریفله­مه­یه گلمز اونو اوخوماق و دوشونمک لازیمدی...

شاعیر اوخونماسا، او چوخدان اؤلموشدور...

ساده­سن و گؤزل بیر سالام کیمی... قیسا شعرلر توپلوسو اوخوماغا دَیر...

کیتابی پینار یایین ائوی نشر ائتمیشدیر.

 گؤی اوزو داش ساخلاماز (شعر توپلوسو)

رامیز روشن  (ایکینجی چاپ)

 آذربایجان چاغداش شعرینین اؤتن اون ایلده ان قاباقجیل تمثیلچیسی اولان رامیز روشن­ین " گؤی اوزو داش ساخلاماز"،  سئچیلمیش شعرلر توپلوسونون ایکینجی چاپی دا آرتیق ایشیق اوزو گؤردو.

یاشماق سیرا کیتابلاریندان اولان اثر، کئچن ایلین اورتاسیندا، خانیم زهرا قیطرانی­نین کؤچومه­سی و مشهور رسام و گرافیست  اردشیر رستمی­نین ایچری طرحرلریله و هابئله آیخانین جیلد طراحلیغی ایله و سعید موغانلی­نین ائدیت و حاضیرلاما چالیشیغی ایله ایشیق اوزو گؤرموشدور. شاعیرین سئچیلمیش شعرلرینی احتیوا ائدن، گؤز اوخشاییجی و کئفییتلی یایینلان اثر بیر نئچه آی سوره­سینده کیتاب ساتیش ائولرینده یاخشیجا قارشیلانیب و توکندی.

" گؤی اوزو داش ساخلاماز"  شعر توپلوسو آذربایجان شعرینین دونیایا وئره­جک اورنک­لریندن بیری کیمی ساییلا بیلر. وورغولاماسی یئرینه دوشردی کی او نسلدن (رامیز دؤورو) آذربایجان شعرینین ان بؤیوک و تانینمیش تمثیلچی­لریندن (رامیز روشنله بیرگه واقیف صمد اوغلو، روستم بهرودی، واقیف بایاتلی، علی صمید کور...) کیمی نهنگ آدلاری سادالاماق اولار.

هابئله بو دؤورون نثر  و حیکایه-رومان تمثیلچی­لریندن (اسماعیل شیخلی­دان سونراکی نسلدن "آفاق مسعود، آنار، ائلچین افندی­یئو، اکرم ایلیسلی، گول­حسین حسین­اوو، مولود سلیمانلی" کیمی ) نثر نهنگ­لرینین آدلارینی چکمک اولار.

رامیز روشنین باشقا اثرلری (بیر یاغیشلی نغمه، کپنک قانادلاری، آی ایشیغی) کیتابلاری دا آرتیق حاضیرلانمیش و نشر اجازه­سینه گؤندرلیمیشدیر.