من هله اؤلمه میشم...

سیما دیدار

منه نه اولموش

ثانیه- ثانیه قادینلاشیرام

زامان آیاقلاریمین آلتیندا یئنیلرک

دئیه سن اؤلمه میشم

اورگیم ترپه نیر  هله

ثانیه لر ده  دایانسا

من دایانمارام

اؤلدوره بیلمه دین منی

من هله وارام ...

.................................................................................................................................

سایین سیما دیدار (شاعیر-یازیچی و  ژورنالیست) یاشماق ادبی- بدیعی (آذربایجان یئنی ادبیات درگیسی)نین سوروملو مودیری و  گونئی آذربایجاندا یئنی ادبیاتین و ژورنالیزمین اؤنجوللریندن بیری کیمی ایللر بویو چالیشمیش و ایندی ایسه بؤیوک میللتیمیزه زیندان بورجونو اؤده مکده دیر... 

بلکه ده بو بورج بوتون تورک اوغوللارینین اؤده یه جه یی گؤره ودیر.                                 الیمیزدن نه گلیر کی؟    زیندان جانیوا یاراسین باجیم...

یانان یاشیل

حبیب ساهرین سئچیلمیش شعر مجموعه سی

درله ین: رسول یونان

آذربایجان سربست شعرینین آتاسی ساییلان حبیب ساهرین شئچیلمیش شعر توپلوسو رسول یونان جنابلارینین امه گی ایله افکار انتشاراتی طرفیندن یایینلاندی.

کیتابین چاپی هر جهتدن تقدیره لاییقدیر. چوخ پروفسیونال و لاییقلی چاپ کیفیتی و هابئله شعرلرین سئچیمی و صاف چوروک اولماسی دا ماراق دوغوراندیر. بو گونه کیمی اوستاد حبیب ساهردن بئله تر-تمیز اثر بوراخیلمامیشدی. کیتابدا آذربایجان تورکجه سینین املا قایدالاری ایسه بوتونلوکله وارلیق اورتوگرافی اساسیندا گئتمه سی دیلیمیزین واحید بیر املا و اورتوگرافی اساسینا چاتماسیندان خبر وئره بیلر.