| تبليغات | X |
 |
 |
|
| آذربایجان یئنی ادبیات درگیسی/AZƏRBAYCAN YENİ ƏDƏBİYYAT DƏRGİSİ |
|
اوچو 100 تومن هر خانوادهیه لازیمدی کیتاب یازماق، سانباللی اثر یاراتماق و اونلارا مجوز آلیب، چاپ ائتدیرمک، هئچ ده بیر ایش دئییل!.. بونا باخمایاراق کی هربیر اثری یاراتماغا درین دوشونجه، بیلیک و اینام گرکدی. و اونا مجوز آلماغا بولون- سولون دؤزوم لازیمدی!.. ایندی کیتاب یاییب، ساتیشا چاتدیرماق، کیشی ایشی یوخ، حضرت فیل ایشیدیر!.. دردلی دئیینگن اولار دئمیشلر. اونلارجا کیتاب چاپ ائتدیک و کیتاب ساتیش ائولرینه گؤندردیک، ایکی ایلدن سونرا حساب سوردوق. بیری دئدی: -هله ساتیلماییب. بیری دئدی: بَی پایلادیم گئتدی. بیری دئدی: ورشکست چیخمیشام. بیری دئدی: بیزه کی بیر شئی گؤندرمهییبسیز! بیری دئدی: سیزی تانیمیرام آغا، بیرده بورا زنگ ائلهمهیین. بیری ده دئدی: بیر ایکی آیا کیتابلاریزی گئری قایتارارام گلر!!! بیری گلن ایله قرضالحسنه چکی وئردی. بیری تئلفونلاریمیزی گؤتورمهدی. بیری دیلنچییه خیردا پول وئرن کیمی بیر شئی آتدی اووجوموزا. بیری یازیچینی بَیهنمهدی. بیری جیلدیمیزی بَیهنمهدی. بیری اؤزوموزو بَیهنمهدی. بیری دئدی: دردلی دئیینگن اولار.......... اؤتن واختلاردا یایینلادیغیمیز کیتابلاردان، بیر نئچهسی اوستوموزه قاییدیب. بیر ده اونلاری رئکلام ائدیریک. اوچو 100 تومن، هر خانوادهیه لازیمدی!..
بایات هایکولار (2000 هایکو) ژاپن شعری چئویرن: راسیم قاراجا حاضیرلایان: سعید موغانلی یایینلایان: یاشماق درگیسی قرافیست: آتابای بیرینجی چاپ 1386 تهران تیراژ:2000 - قیمت: 2500 تومن
دؤرد شاعیر قیرخ دوعا (شعر مجموعهسی) واقیف صمداوغلو، روستم بهرودی، رامیز روشن، واقیف بایاتلی حاضیرلایان: سعید موغانلی یایینلایان: یاشماق درگیسی قرافیست: آتابای بیرینجی چاپ 1386 تهران تیراژ:2000 - قیمت: 1800 تومن
قوردلار (نمایشنامه- پیئس) غلامحسین ساعدی چاپا حاضیرلایان: سعید موغانلی یایینلایان: یاشماق درگیسی قرافیست: مهیار علیزاده.آیخان بیرینجی چاپ 1386 تهران تیراژ:5000 - قیمت: 700 تومن بو اثر تبریزلی یازار غلامحسین ساعدینین تکجه تورکجه اثریدیر.
عصریمیزین یوخوسوندا (شعر توپلوسو) علی جوادپور یایینلایان: یاشماق درگیسی قرافیست: مهیار علیزاده.آیخان بیرینجی چاپ 1386 تهران تیراژ:1000 - قیمت: 2000 تومن
قیزیل آلمالار (شعر توپلوسو) 100 شاعیردن 100 کیچیک شعر حاضیرلایان: سعید موغانلی یایینلایان: یاشماق درگیسی قرافیست: مهیار علیزاده.آیخان بیرینجی چاپ 1385 تهران تیراژ:2000 - قیمت: 700 تومن
گؤی گؤزلو تانری (شعر توپلوسو) ملیحه عزیزپور یایینلایان: یاشماق درگیسی قرافیست: مهیار علیزاده.آیخان چاپا حاضیرلایان: سعید موغانلی بیرینجی چاپ 1387 تهران تیراژ:2000 - قیمت: 700 تومن |
|
+ یازیلدی
2008/11/13ساعات 4:7 یازارلار قروپو |
|
|
زیندان شعرلری
6 سنی سئویرم... سنی سئومیرم... سنی سئویرم... سنی سئومیرم... قورتاماسایدی بو تسبئح دنهلری.
سئومیرم یالقیزلیغی سنسیز سئویرم قالابالیغی سنینله یالقیز یالقیزلیغیم قالابالیغیندیر "تربیت" آغزیندا "ارک" قاباغیندا * من گؤزلرینین سعید موغانلیلیغی یاشیلدان ماوییه چالارکن یار یار دئدیم، یاردیم اول نه اولار اللریم اوزانیر ساچلارینا... گونشین یاندیر منی یاخ یار منی، آ...خ... یا گؤزلرین اولماسین یا دونیا کئفیم بئله چکدی باخ! بورجود امامیهدن واغزالا گل "آلما آتدیم نار گلدی کتان کؤینک دار گلدی قاپییا گؤلگه دوشدو ائله بیلدیم یار گلدی" قیر دویمهلرینی واغزالا گل یانی ترمینالا گل بیر جوت بیلیت آلمیشام منی ده گؤتور تهرانا "ائوین"ه گل، ائویمه گل.
بیر جوت گؤزلرینی بیر جوت باشماقلارینی بیر پاکات قهوه شوکولاتی بیر جوت کیتاب گَتی... یار قوردلار و قارانقوشلار ان سئودیییم اینسانلار...
7 سولماز تبریزلینین روحونا... تربیت آغزیندان باشلانیر دونیا سن رسول رضانین رنگلریندن باشلانان کیمی بوغدایا چالار اوزون آلچایا گؤزلرین ساچلارین هئیوایا... * گؤزلریمدن چیخان ایت دیرسهییدیر غوربت یوخلوغون ائله قارا- قانچیم ائلهییب منی بادیمجانا چالیر گؤزلریمین آلتی خیخدیریر منی بو گؤینرتینین رنگی کیریخدیریر منی ارکه چالان بوخاغین - یوخ کیمین تَپییی گؤگسل گؤزلریمه چاتارکی (غوربتدی کی سونجوق آتیر هردن هردن ائله جوگگولدهییرم، جیققیریم چیخمیر.) اوزونه گتیرمیرسن بو شوربا قیزدیرمانی یاناغینا یاغ تؤکولوب بالدیرینا بال سنه ویزیلدایان آریلار بیلیر نه دئییرم منی فیلم ائلهییبسن بیلدیردن گئی آدیداسلارینی ساری گنجه یایلیغینی بو دَفه ساریما منی شاه اسماعیلین قبری اوسته گؤزلهییرم امامیهدن شیخصفییه 4 ساعات یولدور، 4 ساعات شاها لووغالیق ائدهجهیم، 4 ساعات صاندیق تؤکهجهیم، 4 ساعات شاها شعر، 4 ساعات شاها ائلچی...
8 نادیر ایلاهینین یایینلانمایان شعرلرینه دوشونرکن جیردیر جیر بوتون مکتوبلاریمی اسپام بیلدیر دئلئت ائله * من داغدان گلیرم چپیشلریمیز یئملیک دستهلریمی یئدیلر سنه من قالدیم. سؤی منی توپور گلدیییم یوللارا سئو داغلاری اولورسا داغ اول "سنده گؤزوم قالیب" * کتدی داغدان گلیب باهار خانیم او نادیر ایلاهینین یاز شاگیردیدی شاهسئون گؤزونده قابارلارا باخ دوداغیندا یاغ گتیریب دیشینده یئملیک یاغلان یاغیشلان یاغمالان شَهَر قوراق کئچیر.
آردی |
|
+ یازیلدی
2008/11/13ساعات 4:5 یازارلار قروپو |
|
|
زیندان شعرلری
بو گون 7-7-87 سوسیالیست یاغیشلار یاغیر کاپیتالیست بیر گونش شاخیر هاوا توتقون، هاوا نیهیلیست هر نه یئریندهجه پای-بؤلوش اولوب منیم سئللولومدا نَسه چاتیشمیر
سئویملی قارداشیم، غلامرضا امانی حضرتلرینین اولو روحونا... اوین- پاییز- 1387 دووارلار اوز- اوزه گلیر بو گئجه دووارلار سؤز- سؤزه گلیر بو گئجه دووارلار گؤز- گؤزه گلیر بو گئجه بو گئجه دووارلار آراسیندایام. * قارانلیق قلبیمی الینه آلیر شاعیرلیک رویامی بئلینه آلیر گودوکچو شعریمی دیلینه آلیر بو گئجه روحومون چاراسیندایام. * یالقیزلیق جیسمیمی قیلینجلایارکن رویالار فیکریمی سونوجلایارکن کیمی دانلایارکن، او سوچلایارکن بو گئجه دونیانین هاراسیندایام؟ * "بارازا" اورَییم داریخدی آخ ائی... "لوایی" بو گئجه اویاخدی آخ ائی... "امانی" شعریمه قوناخدی آخ ائی... بو گئجه شعریمین یاراسیندایام.
1
آدین آزادلیقدیر گؤیلومه دوشور
آدینی تئرور ائدیرلر آدینی گودورلر آدینی گولـلهلهییرلر... آدین ایلقارا سئوگیناز ناظیم حیکمته «مانا» آدینی قویاق خانیم ناز علی کریم حسین جاوید میکاییل مشفیق آدین مالکوم ایکس لورکا اوختای، زهتابی آدین عاشیق ماهنیسی اوخونور حسین جاوانین بوغازیندان آدینلا دانیشیر فریدون ابراهیمی آذربایجاندان آدین حلاجدیر کسسگ آتیرام آدین نسیمیدیر سویولور مئیدانلاردا گؤیلومون حلبینده سویوندوردوغوم گئجه تک آدین شریعتمداریدیر فاناتلار بوغور آدین من، دوستاق ائوین ... آدین لواییدیر گؤزوندن دوغولور آدین زیبا کرباسیدیر یوخوما گیریر آدین هئچ زاددیر قوجاغیمدا لولهلهنیر... قان- تر ایچینده چالینیر کسمه شیکسته آدین آدین قاراچایدیر سورگونده اؤلور سن بانی چیچک، شاصنم سن گولگزسن شاه عابباسا زوررانیرسان آدین دمو.....چولاردیر زینداندا یاتیر آدین دمو کرات آدین سئوگی، سئوگیناز آدین سولمازدیر خزره محکوم و بیر موغانلی شاعیردیر داماندا قالیب ........................... آدین نازدیر، آدین آز... آدین آزاد، آزاد ناز، آدین سیدجعفردیر گؤیلومدن قاچیر آدین آزادلیقدیر گؤیلومه دوشور آدینی تئرور ائدیرلر آدینی گودورلر آدینی گولـلهلهییرلر...
… آدیندان موغیات اول جانیم!.
آردی |
|
+ یازیلدی
2008/11/13ساعات 3:31 یازارلار قروپو |
|
|
بیرینجی صحیفه آرشیو |
| بیزیم وبلاق |
«یاشماق» آذربایجان یئنی ادبیات درگی سینین وبلاقی
یئنی ادبیات آنلاییشینا دوغرو |
| گوندَلیک باغلانتی لار |
|
G O Z L A R I A Y D I N گوندلیک باغلانتی لار آرشیوی |
|
RSS
|
