گؤی اوزو داش ساخلاماز

شعرلر و پوئمالار

رامیز روشن

بؤیوک نسیمی­نین...

رامیز روشنین...

سلیمان­اوغلونون...

گؤگسل دویغولارینا...

                                                (درین سئوگی ایله یاشماق) 

 کیم دئییر یوخودا اؤلمک آساندی

کیم بیلیر نئجه‏دی یوخودا اؤلمک

بلکه‏ ده ان بؤیوک درددی عذابدی

ان پیس ایشکنجه‏دی یوخودا اؤلمک

...بیز زامان-زامان ائله جمعیتده یاشادیق کی، اینسانین نسه ائله‏دییینه گؤره یوخ، نسه ائله‏مه‏دییینه گؤره قیمت وئریلدی...

...آداما قیمت وئرمک او قدر ده آسان دئییل. ائله مقام یئتیشه بیلر کی، یاخشینین پیس، پیسین یاخشی جهتی اوزه چیخار. بلکه یاخشی و پیس آدام یوخ، یاخشی و پیس زامان وار. یاخشی زاماندا یاخشی آدام اولماق چتیندی.

پیس واخت اینسانداکی ناقیص جهت‏لره یول آچیر حتی بئله مقامدا یاخشی آدامین دا پیس کیفییتی قاباریر نئجه آدام اولدوغومو دئیه بیلمیرم، اونو بیلیرم کی، من زاماندان آسیلی دئییلم دَییشمز و آردیجیلام...

رامیز روشن

شعر قوناقلیغی

قوجاغین امنیّت، گؤزون تروریست

سعید موغانلی

گؤزلرین آلا گؤز ماهنی

گؤزلرین اؤلوم ائنسکلوپئدیاسی­دیر

و قادینلیغین

                  تاریخین ایکینجی یاریسی...

اوشویورم

                    منی باغرینا باس

عشق اولسون او ماوی گؤزلرینه

سن اؤلومله یاشامین

                     دؤنوش نوقطه­سی­سن!

قوجاغین امنیّت­دیر

گؤزون تروریست...

باش-سؤز یئرینه

سعید موغانلی

بیر سیرا اؤلکه‏لرده قزئت و درگی یایینلاماق، آزادلیغا و اسیرلییه گئدن قیل کؤرپوسونون اوستونده یئریمک کیمی‏دیر. ویجدانلی و پروفسیونال ژورنالیست اولماق ایش دئییل، ایکینجی باش آغریسی‏دیر. بوتون دالی قالمیش اؤلکه‏لرده دولت‏لرین امنیتی باخیشیندا، ژورنالیستدن دیواری آلچاق و باشی داشلی‏سی بیر ده ژورنالیستدیر. گلیشمیش اؤلکه‏لرین ترسینه، اونونساده‏جه گونده‏لیک ایشی گوناه و  بیرینجی اتهامدیر.

بئله بیر دورومدا یاشماق درگی‏سی،  محض چاغداش ادبیاتلا باغلی موباحیثه‏لره قاتیلماغی اؤزونه باشلیجا وظیفه بیلمیش، بو یؤنده چالیشماغا و بو یولدا جیدّی آددیم‏لار گؤتورمه‏یه یارادیلمیشدیر. درگیده چاغداش ادبیات(تنقید/ حیکایه‏/ شعر) قونولارینا یئر وئره‏جه‏ییمیزه سؤز وئردیک. چاغداش و آوانگارد ادبیاتدان مباحیثه‏لر آپارماغا جهد گؤستردیک.