| تبليغات | X |
 |
 |
|
| آذربایجان یئنی ادبیات درگیسی/AZƏRBAYCAN YENİ ƏDƏBİYYAT DƏRGİSİ |
|
|
|
+ یازیلدی
2009/11/3ساعات 15:14 یازارلار قروپو |
|
|
Adım həyəcandır Səid Muğanlı
Bu şeir Əli Təbrizli dən türk dünyasına aldığım baxış dır Onun ulu ruhuna pay olsun
Adım həyəcandır, adım Azərbaycandır Adım təbrizin dəmir aşığının paslı dodağındadır Müsəlla da yandırılan saz çanağında Bəbək də mənəm beyrək də mənəm Qanlı bayraqlı Babək də mənəm Dədəm qurqudun qopuzlu dili Adım Tümrüsün qanlı əlidir At üstü yaşayan atilayam آردی |
|
+ یازیلدی
2009/11/2ساعات 16:23 یازارلار قروپو |
|
|
متن، دوزومو بیتمهین بیر پازلدیر
"اُحِبُ دئدیم ایت قاپدی منی". . . شعرینین ائلَشتیرَل اوخونوشو جعفر بزرگ امین (یارین)- تبریز2009
بو گون مدرن هرمنوتیک باخیمیندان شعر، اؤیکو، رومان، بیر قطعه موسیقی، نوماییش، فیلم، نقاشی و. . . بیر متن دیرلر. متن سونسوز بیر دونیادیر، یاشامدیر: زامانسیز، مکانسیز، چئوره سیز و سینیرسیز. یوزلر، مینلر و میلیونلار اوخوجو، دینله ییجی وسئیرائدیجیلر سایی و یوزلر، مینلر و میلیونلار دؤنه اوخونوب، دینله نیب و گؤرونوب و یئنی دن باشا دوشولوب، یئنی آچیلاردان یوزوملانیب یازیلاسیدیر متن. متن بو گونکو آنلامدا بیر پازل دیر منجه. دوزومو و دوزه نی بیتمه ین بیر پازل. آردی |
|
+ یازیلدی
2009/10/5ساعات 23:22 یازارلار قروپو |
|
ابدیته دوشن یارپاق
یارپاق قزئتی / اردیبهشت - 1384 / بیرینجی ایل / بئشینجی سایی / 12-جی صحیفه سعید موغانلی آذربایجانین چاغداش یازیچی، تنقیدچی و شاعیرلریندن بیری ساییلان «علی تبریزلی حسینآغااوغلو» 1308-جی ایلین تیر آیینین دؤردونده، آجیلی-شیرینلی اولایلار قوینو اولان تبریز شهرینین «منجّیم» محلّهسینده آنادان اولموشدور. ابتدایی و اورتا تحصیلاتینی اوردا بیتیریب، بیر ایل آذربایجان دموکرات فرقهسی دؤنمینده تورکجه تحصیل آلمیشدیر. اون بئش یاشیندا تهرانا کؤچریلشدیریلمیشدیر. علی تبریزلی تهراندا غریب اولدوغو حالدا یورولماز چالیشقانلیقلا بیرگه درگی و کیتابلار اوخویوب، آنا دیلینه سئوگی و سایقی ایله گون کئچیریردی. او ایلک سئوداسینی شعرله عکس ائتدیریر و دؤنهلرله پهلوی رژیمینین زیندانلاریندا دوستاق اولور. او گنج ایکن، چئشیدلی ایشلرله مشغول اولور و نهایت «آتروپات» یایین ائوینی آچیر. اوردا، شاه اسماعیل ختایی یاشاییشی و شعرلری، ایکی جیلدده (بو کیتاب بیر رومان شکلینده و آشیق روایتی اساسیندا یازیلیب و شاه اسماعیل ختایینین بیر چوخ قوشما، غزل و دؤیوشلرینی عکس ائتدیریر. اونون عرب زنگی ایله دئییشمه و دؤیوشمهسی خصوصی ماراق دوغورور.)، دیل و ادبیات، آذربایجان کلاسیک ادبیاتیندان شعر مجموعهلری، فضولی دیوانی، اصلی- کرم، کوراوغلو داستانی، سلمان ممتازین شعرلری، واحیدین غزللری، خود آموز زبان ترکی آذربایجانی با ترجمهی فارسی، عزیز نسینین بیر نئچه حیکایهسی، غرللر (علی تبریزلینین غزللری) و ساوالان ایله بیرلیکده آذربایجان ترانهلری ایکی جیلیدده و داها بیر نئچه باشقا کیتابلار حاضیرلاییر و چاپ ائتدیریر. او اؤزونو بیر یازیچی، آراشدیریجی، تاریخچی و دیلچی کیمی تانیتدیریر و هر نهدن اوستون او «ایران تورکلری» دئییلن مانیفئستین تئوریسینی کیمی و ایراندا تورکچولوگون بانیسی کیمی تانینمیشدیر. تبریزلی علی، دیل و ادبیات کیتابیندا رحیمسیز بیر تنقیدچی کیمی دیلیمیزه خور باخانلاری، دیلیمیزی و تاریخیمیزی تحریف ائدنلری قامچیلاییر. بو کیتاب، دیلیمیزده تنقید قونوسوندا یازیلان ایلکینلردن ساییلا بیلر. اثرین دیلی سون درجه آخارلی، ساده و عموم دوشونندیر. تبریزلی علی، شعرلرینده ده اؤزللیکله غزللرینده چوخ ساده و آخارلی بیر دیلده، سیاسی و میللی موضوعلارا توخونور و بوتون میللت دوشمنلرینی تنقید آتشینه توتور. او، گنجلری، ساغچیلار و سولچولارین تلهلریندن چکیندیریر و ائله اونا گؤره ده دؤنهلرله شاه قولدورلارینین ایشکنجهسینه معروض قالمیشدیر. او، اؤتن چاغین سیخینتی و بوغونتو ایچینده، «آتروپات کیتاب ائوی»ینده آذربایجان دیل و ادبیاتینا عؤمرونون سونونا کیمی باشاردیغی قدر قوللوق ائتمیشدیر. (آتروپات یایین ائوی، تهراندا، پارک شهرین قاباغیندا قدیمکی «آژیر» قزئتینین قونشولوغوندا یئرلشمیشدیر) علی تبریزلی 1376-جی ایلین بهمن آیینین اوناوچونده تهراندا ابدیته قووشموشدور و اؤز وصیتینه اساسن دوغما یوردو تبریز شهرینین «وادی رحمت» قبرستانینین عایلهوی مزارلاریندا تورپاغا تابشیریلمیشدیر. روحو شاد، یولو گئدرلی...
|
|
+ یازیلدی
2009/10/5ساعات 22:59 یازارلار قروپو |
|
|
پینار یایین ائوی طرفیندن «یاشماق کیتابخاناسیندان» اوچ یئنی کیتاب یایینلاندی.
۱. سنسیز گلن صاباحا گون آیدین (شعر توپلوسو) یوسف خیال اوغلو
۲. سئوگی آزادلیقدیر (شعر توپلوسو) سهراب طاهر
۳. قرنفیل اوچ گول آچار (شعر توپلوسو) بهرام سورگون-آرزو مختاری-یالچین سهند
پینارین ادبی سیرا کیتابلاریندان کئچن آیلاردا بو کیتابلار دا یایینلانمیشدیر:
۱. سئودان منی (شعر توپلوسو) احمد عاریف
۲. عباس میرزا و آذربایجان (تاریخ تحلیلی) امینه پاکروان-جوانشیر موغانلی
   |
|
+ یازیلدی
2009/10/5ساعات 22:49 یازارلار قروپو |
|
|
عباس ميرزا و آذربايجان کیتابی یایینلاندی قاجار تاریخینه عایید اولان، سایین «امینه پاکروان»-نین یازدیغی «عباس ميرزا و آذربايجان» کیتابی، جوانشیر موغانلینین گؤزل ترجومه سیله، پینار یایین ائوی طرفیندن یایینلاندی. اثرده قاجار ولیعهدی عباس میرزانین حیاتی و وطن اوغردوندا سارسیلماز مباریزه سی و هابئله آذربایجانچیلیق دوشونجه سی ایره لی سوردورولور. ولیعهدین آجیناجاقلی اؤلومو، بوتون آذربایجان قهرمانلارینین آجی اؤلوملریله اوخشارلیغی، وطنداشلیق طالعیمیزده ماراق دوغوراندیر. کیتاب آذربایجان تورکجه سینین «اورتاق» دیل دئییلن اساسی ایله چئوریلمیش و تورکجه میزین سئحیرلی گؤزللییی و اؤزللییینی اورتایا قویموشدور. هابئله کیتاب چوخ کیفیتلی و اورَیه یاتان بیر دورومدا یاییملانمیشدیر. کیتابیین حاضیرلایانی سعید موغانلی و گرافیستی ایسه علی رضایی جنابلاریدیر، کیتابا اوچ مین تومن دَیَر قویولموشدور. کیتابا گؤره سایین چئویرمن «جوانشیر موغانلی»نین اؤزل باخیشیندان پارچالار اوخویورسونوز: عزيز اوخوجو! آذربايجاندا فارس شووينيستلرينين تورکلري سويسوزلاشديرما پلانلاري ایله، آذربايجان تاريخيني و گؤرکملي شخصيتلريني ايران مرکزلي بير ياناشما ايله فارس کيمليگينه، فارس تاريخينه عايد ائتمهيه چاليشيرلار. بوتون دؤولت ايمکانلاري دا فارس ذهنييتي مرکزلي سيستئمين الينده اولدوغو اوچون بو ايشده باشاريلي اولموشلار. آذربايجاندا اويانيشين و ميللي کيمليگين يوکسلديگي بير واختدا تاريخي گئرچکلرين اولدوغو کيمي درک ائديلمهسينه جيدي احتيياج واردير. «عباس ميرزا و آذربايجان» آدلي کيتابين بو احتياجي برطرف ائتمکده چوخ تأثيرلي اولاجاغينا اينانيرام. ياخين تاريخيميزين بيلينمهسي باخيميندان کيتابدا گئرچکدن گئنيش بيلگيلر وار. ايلک دفعه اولاراق 19ـجو عصرده آذربايجان اوردوسونون قورولماسي و ايلک دفعه اولاراق دا قاجار شاهزادهسي عباسميرزانين باشچيليغي ايله آذربايجان اوغروندا سيلاحلي ساواشين تفرعاتي حاققيندا گئنيش بيلگي الده ائدهجکسينيز. شاهزاده، شرقده ايلک سياسي شخصيت اولاراق سئکولار بير دؤولت قورماق ايستهميش، بو سببدن ده فارس ميللييتچيليگي اعتيراضينا توش اولموشدور. بونا قارشيليق اولاراق عباسميرزا آذربايجان مرکزلي دين پروژهسيني گليشديرمگي دوشونموشدور. بو ايستيقامتده اؤزلليکله ده روسييا ايمپئراتورو پيوترون رئفورملاريندان دا تاثيرلنميش، اونون ساققال اينقيلابيني آذربايجاندا گئرچکلشديرمک نييتينده بولونموشدور. بو ايشيني ايلک اؤنجه آذربايجان اوردوسونون عسگرلري اوزرينده تطبيق ائتميش، هر کسين آوروپاليلار کيمي ساققاليني قيرخماسينا امر ائتميشدي. شاهزادهنين بو عملي دين خاديملرينين چوخ جيدي اعتيراضينا سبب اولموشدور. چونکو بعضی دینچیلره گؤره ساققال قيرخماق ديني عادتـ عنعنهلره اويغون گلميردي. شاهزاده، قاجارييه دؤولتينده و آذربايجان اوردوسوندا خيدمت ائدن فرانسانين حربي موتخصيص و موهنديسلري واسيطهسي ايله 1789ـجو ايل بؤيوک فرانسا اينقيلابينين مودئرن طلبلري ايله تانيش اولموش، دريندن تاثيرلنميشدير. بو سببدن ده هم پايتاختي تبريزه کؤچورمک، هم تورک ديليني قاجار ايمپئراتورلوغونون رسمي دؤولت ديلي اولاراق اعلان ائتمک، هم ده 19ـجو عصر شرطلرينه گؤره سئکولار بير دؤولت قورماق ايستهميشدير. بونون اوچون آذربايجانين حربي، مدني و ايقتيصادي حياتينين مودئرنلشمهسي ايستيقامتينده بير چوخ رئفورملار گئرچکلشديرميشدير. آنجاق عباسميرزانين ايصلاحاتلاريني دوردورماق اوچون دين خاديملرينين تلقيني ايله آتاسي فتحعليشاه اونو آذربايجاندان اوزاقلاشديرماق زوروندا قالميشدير. خوراساندا وفات ائدن عباس ميرزا سون نفسينده «آذربايجان، آذربايجان»ـ دئيه گؤزلريني يومموشدور. کيتابدا 19ـجو عصر دونيانين بؤيوک دؤولتلرينين اورتا دوغو و مرکزي آسييا ايله باغلي پلانلاري، شاهزادهنين ديپلوماتيک و حربي مانئورالاري حاققيندا هرطرفلي بيلگي واردير. بو بيلگيلر 19ـجو عصرين بيرينجي ياريسيندا قاجارييه ده خيدمت ائدن فرانسا، اينگيلتره، روسيا کيمي خاريجي دؤولتلرين تمثيلچيلرينين رسمي مکتوبلاريندان و شخصي خاطيرهلريندن آلينميشدير. ان اؤنملي اولان دا بودور کي، او زامانکي ساواشلار فارسلارين و روسلارين اويدوردوقلاري کيمي ايران ـ روسييا آراسيندا دئييل، قاجارييهـ روسييا آراسيندا باش وئرميشدير. بو ساواشين باش ايفاچيلاري ايسه قاجارييهنين آذربايجان اوردوسو ايله روسييانين قافقاز اوردوسو اولموشدور. داها آيرينتيلي بيلگي اوچون کيتابي ديققتله اوخوماق لازيمدير. ترجومه ده بلکه بوگونکو آليشيلميش آذربايجان تورکجهسيندن بير آز فرقلي اوسلوبا راستلانا بيلرسينيز. بونلار شعورلو شکيلده ائديلميشدير. کيتابدا درينلشديريلميش و اؤز کؤکو اوستونده دوغوب ـ دوغورا بيلهجک آنا ديليميزين ايمکانلاريندان گئنيش شکيلده فايدالانماغا چاليشيلميشدير. http://www.yashmaq.trk.ir /*]]--> |
|
+ یازیلدی
2009/9/29ساعات 3:19 یازارلار قروپو |
|
|
|
+ یازیلدی
2009/9/27ساعات 0:1 یازارلار قروپو |
|
|
سایین ارسلان میرزایی نین قاشقای دیلینده (اوزاق یول) آدلی شعر توپلوسو یایینلاندی.
|
|
+ یازیلدی
2009/9/26ساعات 2:25 یازارلار قروپو |
|
|
مردی که گورش گم شد، اؤلومه بارماق ائله ییر... سئویملی حیکایه یازاری و تنقیدچی (حافظ خیاوی) سی سی یو اوتاغیندا، حیات اؤیکوسونون ان رئال آنینی تجروبه ائتمه کده دیر. ایکی آیا یاخین تبریز خسته خانا اوتاقلاریندا سسسیز-سمیرسیز آغیر خسته لیکله مبارزه آپاران یازار بو گونلرده تهرانانین کسری بیمارستانینا گؤندریله جک. یاشارکن آغ-بوز آتی بودره مه سین قلم قیلینجی کوته لمه سین گؤزلری اورمو، اورگی ساوالان، بارماقلاری قیزیل اولسون دده م قوقود یاردیمی اولسون... آمین خانیم هئی...
|
|
+ یازیلدی
2009/9/20ساعات 5:12 یازارلار قروپو |
|
|
آدین آزادلیقدیر گؤیلومه دوشور سعید موغانلی
اُحِبُّ دئدیم ایت قاپدی منی بوراخما اللریمی ساتن کؤینکلیم اردبیل کوچه لرینده ایتَرَم بیردن یومما گؤزلرینی کتان کؤینکلیم باخیشینین هاواسی باشیمدا گزیر ***
سسینی توراغاییلار اوخویور قاتارلار تورموز ائدیر ماشینلار توی سیغنالی چالیر سسینی شعیر یازیرام سسینی سئویشیرم. - باغیشلایین خانیم سسیزی ایتیرمیشم سیزین موبایلین نومره سی زیندانا دوشوب آدینیز سارایین دؤشلویونون جیبینده گئتدی چایی توللانا بیلمه دی عشقه ووردو اؤزونو... آدینیزی خان چوبان بازار آغزیندا یئر آلما چؤرک ساتیر. آدینیزی ایستی سیمیشقا چیرتداییرام آدی نه ایدی... سیزین؟؟؟
هه کلاسیک شعر، فلاش فیکشن
یوخ آد سیغمیر ادبیاتا سسیزی یاشاییرام سادهجه آخی سئللولوم کیچیکدی بیر آز سیز سیغیشمیرسیز یومروغومدا یئرلشن قلبیمه یومروغوم آچیلسا بوتون قزئتلر خبردن داشار داشماسایدی آرپا چایی داشما... داش... *** سسینی یاشاییرام اردبیل کیمی سسینی "سحر" "سحر- سحر باغا گیردیم" باغیشلا خانیم "پیراتملیکدن بالیخلی"یا نئجه گئدیم من؟ آخی ساوالانی آشماغیم گلیر سیزین سسیزی چوخدان گؤرموشم تئلفونوز زیندانا دوشموشدو مننن خوشوم گلیردی آدینیزدان آدی نه ایدی... سیزین؟؟؟
تئلفونوز دیلیمین اوجوندان صیفیردن باشلانیردی سیزینله "یاشماق"یم گلیر یاشاماق ... یاشاماق اولار بو شهرده پولسوز؟
- کیم دئدی من اؤلموشم؟ هانسی یوسف خیال اوغلو؟ آی ائششگ اوغلو! - سارایین دالییجا گئتمیشدیم قورخومدان چایی توللانانمادیم!.. - کیم لووا وئردی منی؟ من بارالاریمی ییغیشدیرا بیلمیرم خانیم بوردان قبریستانا نئچه اؤلو سیغیشار؟ یانی دیریلر نئجه کئف چکیرلر ائهمال-ائهمال بوردان ساوالانا نئچه ؟... گؤزلدی ساعاتیز سوییسدی کوردوستان؟!. یانی دئییرم من ساختا قلبدن باش چیخاردیرام اللریزی وئرین الیمه لوطفن منی بیر یئره گؤتورون خسته خانایا ائوینیز یاخشیدی البتّه نومره زی آلیب قاییدارام سسیزی ایتیرمیشم اینشیلدن بوراخما اللریمی نه اولار "سسین گلسین ساری بولبول" منه بیر آدرسجیک سسین گلسین.
- سیزین ائوه هانسی پلاک لازیمدی؟ هانسی خیابان، منی فخری خیابانیندان سیزه گتیرر ؟ هانسی اوتوبوس؟
اوزوزو چؤندَرین گونشه بیر - ایکی - اوچ تولازلانین منیمله دلیلیگی سارای توللاندی ها... قاداسی... بس اوندا نومره زی وئرین بیر شاعیر سیزی شعیرلندیریر
- من آزمیشام خانیم ناز منی ائویزه، پولیسه آپارین. نومره سی نه ایدی؟ ائویزین! قاپیسی! پولیسین !!. دانیشین موبایلیم سسیزدن دولسون بولوتوث ائدین اؤزونوزو لوطفن باش اوسته یومدوم گؤزلریمی!.. "سسین گلسین باری بولبول" *** من عاشیقم وطن یاخشی گئیمه یه کتن یاخشی کؤینک ایستهمیرم من سیزی گئی....یئمک ایسته ییرم آجام اللریزی یئمه رم واللاه... ***
قاشسیز اوزویومون قاشلیسیندان جیبیمده اولسایدی بارماغیزا نه یاراشیر اوزوک یوخدو منده اوز... یانی دئمه لی سیز هارالیسیز؟ شورابیل سیزه اوخشاییر سیز یوخ... آخی تربیه سیزدی آتلاری آغ بالیقلاری آنجاق یانی سیز آغ بالیق نئور گؤلو سیزدن سیز گؤزلسیز دئییرم مطلق گئرچکدن *** اللریمی بوشلاساز، اللریم تؤکولر هاااا کیم ییغیشدیراجاق بو سویوقدا بو قدَر سئوگی بارماقلارینین ایزلرینی. دئییرم هادیر اولون من الیزده قالارام قالسام دا کی "پنجره دن داش گلیر" آی سانسور ائتدیم بیر آزین "آللاها دا خوش گلیر" آی منه بیر زنگ ائله... *** منی راپور وئرمه گؤزلرینله داما وئردیر دامسیزام سند گتیر آدامسیزام سن کی زیبا کرباسی دن ده گؤزلسن نازپریدن ده، هم ده... گؤزوم گؤزونون اویونجاغیدیر بوراخما بوراخما اللریمی نه اولور اردبیل کوچه لرینده ایت قاپار منی سسله آدیمی سسله من؟ من؟ من گونش اوغلویام خانیم سن آی ؟ آدینیز دیله - دیشه گلمیر آدی نه ایدی سیزین ؟؟؟ من سیزه گئدیرم سیز هاچان گلیرسیز منی قوناق ؟!. من.... من..... من..... نه دیلنن دئییم جوجه م آی لاو یو آی آی اُحِِبُ اُحِِبُ اُحِِبُ یا حبیبی قیزا سئوییوروم سِنی بالالی....
گئتمه... دایان... دور... به ائششه یین قیزی آخی سئویرم سنی...
|
|
+ یازیلدی
2009/9/8ساعات 1:40 یازارلار قروپو |
|
|
بیرینجی صحیفه آرشیو |
| بیزیم وبلاق |
«یاشماق» آذربایجان یئنی ادبیات درگی سینین وبلاقی
یئنی ادبیات آنلاییشینا دوغرو |
| گوندَلیک باغلانتی لار |
|
G O Z L A R I A Y D I N گوندلیک باغلانتی لار آرشیوی |
|
RSS
|
